ភ្នំពេញ៖ សំឡេងហូរកញ្ជ្រៀវ មនុស្សអ៊ួរអរ ជាមួយនឹងទូកពាសពេញច្រាំងទន្លេក្នុងរាជធានីភ្នំពេញ បានបង្កើតជាផ្ទាំងទស្សនីយភាពថ្មីនៃព្រះរាជពិធីបុណ្យអុំទូកឆ្នាំ២០២៣ បន្ទាប់ពីបានខកខានចាប់តាំងពីឆ្នាំ២០២០មក។
កម្ពុជាបានត្រឡប់មកប្រារព្ធព្រះរាជពិធីបុណ្យអុំទូកឡើងវិញបន្ទាប់ពីប្រទេសនេះបានទទួលជោគជ័យលើជំងឺកូវីដ-១៩ ការដឹកនាំអាស៊ានកាលពីឆ្នាំ២០២២ កន្លងទៅ។
ព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប គេតែងរៀបចំជារៀងរាល់ឆ្នាំនៅព្រះរាជាណាចក្រកម្ពុជា ដោយមានរយៈពេល ៣ថ្ងៃ គឺចាប់ពី ថ្ងៃទី១៤កើត ១៥កើត ដល់ថ្ងៃ១រោច ខែកត្តិក ដោយឡែកពិធីបុណ្យអកអំបុក សំពះព្រះខែវិញ គេប្រារព្ធធ្វើនៅពាក់កណ្តាលរាត្រី ១៥កើត ខែកត្តិក តែប៉ុណ្ណោះ។
ព្រះរាជពិធីបុណ្យអុំទូកត្រូវបានប្រារព្ធធ្វើតាំងពីសម័យបុរាណ ក្នុងរជ្ជកាលព្រះបាទជ័យវរ្ម័នទី៧ ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹក ខ្មែរ ដែលបានរំដោះទឹកដីរួចផុតពីការជិះជាន់ របស់ពួកខ្មាំងសត្រូវ (ពួកចាម)៕
